КОРЕЯЛИК ИШБИЛАРМОНЛАР ЖИЗЗАХДА

КОРЕЯЛИК ИШБИЛАРМОНЛАР ЖИЗЗАХДА
Корея Республикаси ва Ўзбекистон ўртасидаги иқтисодий-ижтимоий алоқалар ўзига хос тарихга эга. Давлатимиз мустақилликка эришганида Корея биринчилардан бўлиб мамлакатимиз иқтисодиётига сармоя киритган ва автомобилсозлик саноатининг пайдо бўлишига асос солган эди.



Жиззах вилояти ҳокими Эргаш Салиев Жанубий Корея Республикасидан ташриф буюрган 20 нафар ишбилармонлар делегацияси вакилларини қабул қилди. Вилоят ҳокимлиги Анжуманлар саройида ташкил этилган учрашувда вилоят раҳбари Жиззахнинг инвестицион салоҳияти ҳақида меҳмонларга сўзлаб берди ва уларни қизиқтирган маълумотлар билан таништирди.
Жиззах вилоятида 215 та хорижий корхоналар фаолият олиб бормоқда. Шулардан тўрттаси Жанубий Корея Республикаси билан ўзаро ҳамкорликда ташкил этилган. Бу рақамлар яқин келажакда яна ҳам кўпайишига замин бор. Чунки, учрашув мобайнида кореялик ишбилармонлар вилоятдаги истиқболли соҳаларга қизиқиш билдиришди.
Жиззах вилоятида драйвер соҳалар сифатида кейинги йилларда автомобилсозлик, қурилиш, енгил саноат, туризм жадал ривожланмоқда. Автомобилсозликда 2 та завод иш бошлаган бўлса, қўшимча равишда бу йил якуни билан 80 млн. АҚШ долларига тенг бўлган электромобиль ишлаб чиқариш лойиҳаси ҳам иш бошлайди.
Қурилиш саноатиучун хом ашё сифатида 100 га яқин кон ресурслари мавжуд бўлса, ҳозирча фақат шулардан 25-30 таси фойдаланишда ва буларда цемент, оҳак ва базальт маҳсулотлари ишлаб чиқарилмоқда. Енгил саноат тармоғида пахта хом ашёси 100 фоиз вилоятимизда қайта ишланмоқда.
Кореялик ишбилармонлар вилоятда муқобил энергия манбаларига эҳтиёж борлигини ҳисобга олиб, ҳамкорликда қуёш панелларини ишлаб чиқариш, чиқиндиларни қайта ишлаш, ундан энергия ишлаб чиқаришни йўлга қўйиш истиқболлари муҳокама қилинди.

Меҳмонлар Жиззах шаҳридаги IT Park филиали фаолияти билан танишишди. Шундан сўнг, “Жиззах” эркин иқтисодий зонасида маҳаллий тадбиркорлар билан мулоқотда меҳмонлар қишлоқ хўжалиги, автомобилсозлик, кимё саноати, туризм ва бошқа йўналишлар бўйича ҳамкорликни йўлга қўйиш тўғрисида таклифларини билдиришди.

скачать dle 12.0