Регистрация Войти
Вход на сайт
Качественные бесплатные шаблоны dle скачать с сайта
Реклама
» » ИШОНЧНИ ОҚЛАШ БАХТИ...

ИШОНЧНИ ОҚЛАШ БАХТИ...

23-09-2018, 08:49
Автор: Admin
Просмотров: 115
Комментариев: 0
Версия для печати

Мамлакатимизда соғлиқни сақлаш соҳасида кенг кўламли ишлар амалга оширилмоқда. Президентимизнинг ушбу соҳани ривожлантириш, уни тубдан ислоҳ қилишга қаратилган қатор фармон ва қарорлари қабул қилинди. Бу борада бирламчи тиббиёт хизмати, шошилинч ва тез тиббий ёрдам, ихтисослаштирилган тиббий хизмат, хусусий тиббиёт, аҳолининг репродуктив саломатлигини асраш каби йўналишлар устувор вазифа қилиб белгиланган. Қувонарлиси, ушбу соҳада фаолият юритаётган ҳар бир ходим борки, улар давлат эътиборида.

Ҳар йили она Ватанимиз мустақиллиги арафасида Президентимиз томонидан халқимиз маданияти ва маънавиятини юксалтириш ишига қўшган муносиб ҳиссаси, ёрқин истеъдоди ва серқирра ижоди, илмий фаолияти, самарали хизматлари, ёш авлодни она юртга муҳаббат, истиқлол ғояларига садоқат руҳида тарбиялаш ҳамда жамоат ишларидаги фаол иштироки учун бир қанча юртдошларимиз давлат мукофотлари билан тақдирланишди. Улар орасида республика ихтисослаштирилган онкология ва радиология илмий амалий тиббиёт маркази Жиззах филиали директори, тиббиёт фанлари доктори, профессор Сулаймон Абдужабборов ҳам II даражали “Соғлом авлод учун” ордени билан мукофотланди.

Оддий хизматчилар оиласида дунёга келган Сулаймон Абдужабборов болалигиданоқ кўпчилик оқ халатли инсонларга ҳавас билан қарашларига гувоҳ бўлар, назарида уларнинг юриш-туриши, касб-кори сир-синоатга тўлиқ бўлиб туюларди. У кезларда ҳозиргидек ривожланган тиббиёт қайда, аҳоли ўртасида турли юқумли ва юқумсиз касалликлар кўп учрар, уни даволаш учун шифокорлар умуман етишмас эди. Шу боис ҳам ёш йигитча мактабни тамомлаши билан собиқ Тошкент Давлат тиббиёт институтининг даволаш факультетига кириб ўқий бошлади. Эндигина олийгоҳни тамомлаган ёш мутахассисI клиник шифохонасининг хирургик бўлимида ишлай бошлади. Бу ерда анчагина тобланган шифокор колопроктология бўлими мудири этиб тайинланди. Кейинчалик I Тошкент давлат тиббиёт институти “Умумий амалиёт шифокори учун жарроҳлик” кафедраси ассистенти, кафедра доценти вазифаларида самарали меҳнат қилди. 2004 йил эса Республика онкология илмий маркази колопроктология бўлими илмий раҳбари сифатида фаолият кўрсатди. У киши қаерда ва қайси лавозимда ишламасин, шифокорга хос инсоний сифатлари билан тан олинган. Тажрибали ва етук мутахассиснинг меҳнатлари давлатимиз томонидан муносиб рағбатлантирилиб, 2008 йил у“Меҳнат шуҳрати” ордени билан тақдирланди.

2017 йил Президентимиз ташаббуси билан пойтахтдаги 144 нафар малакали шифокорлар вилоятларга тақсимланиб, жойларда тизимни жонлантириш, янгиликларни, шунингдек ташхис қўйиш, даволашни шу жойнинг ўзида амалга ошириш мақсадида юборилди. Тиббиёт фанлари доктори, профессор С.Абдужабборов эса республика ихтисослаштирилган онкология ва радиология илмий амалий тиббиёт маркази Жиззах филиали директори этиб тайинланди. Ўтган йили филиалда иш бошлаган раҳбар шифохонанинг молиявий ҳолати, ходимларнинг меҳнат муҳофазаси, касбига иштиёқи, муомаласи, иш фаолиятини яхшилади, уларни рағбатлантирди. Тиббиёт масканининг моддий техник базаси янгиланди. Онкологик касалликларга эрта ташхис қўйиш ва даволаш ишлари шу ернинг ўзида амалга ошириладиган бўлди. Ёш мутахассисларни иш билан таъминлади. Шунингдек, жарроҳлик бўлимига 200 миллион сўмлик тиббий асбоб-ускуналар, тоза ичимлик суви келтирилди. Айни пайтда таъмирлаш ишлари давом этмоқда.

Тиббиёт соҳасининг қайси тармоғи бўлмасин С.Абдужабборов мавжуд имкониятлардан унумли фойдаланган ҳолда элимиз саломатлигини асраб-авайлаш, касалликларнинг олдини олиш, соғлом турмуш тарзини қарор топтириш, зарарли одатларга чек қўйиш, умуман инсонга, унинг соғлигига зарар етказиши мумкин бўлган барча салбий омиллардан йироқ юриш ва воз кечишнинг қоидаларига риоя қилади, ўзгаларни ҳам шунга ундайди.

–Бу касб инсондан жуда катта сабр-тоқат, матонатни ва фидойиликни талаб этади, –деди Сулаймон Абдужабборов. –Агар шифокорда ана шу сифатлар бўлмаса, танлаган соҳасида муваффақиятга эриша олмайди. Энг асосийси, халқ меҳрини, ишончини қозона олмайди. Эришган ютуқларимда эса аҳил жамоамнинг ўрни беқиёс. Шундай қутлуғ бир кунда камтарона меҳнатим Президентимиз томонидан иккинчи марта муносиб баҳоланганидан ўзгача бир ғурур, таъриф этиб бўлмас шараф ҳиссини туйдим. Зеро, ушбу эътибор юртимизда инсон ва унинг манфаатлари юксак қадрланаётгани, келажак авлоднинг жисмоний ҳамда руҳий камолоти олий қадрият сифатида эътироф этилаётганининг ёрқин намунасидир.

Тиббиёт –бу ҳаёт, тиббиёт бу илм-фандаги катта йўналиш. С.Абдужабборов вилоятимизда фаолиятини бошлаганига кўп бўлмасада, инсонийлик хислатлари билан жамоада обрў-эътибор қозонди, уларнинг дўсти, маслаҳатгўйига айланди. Шифохона бош врачи, олий тоифали онколог Алимардон Болтаев, врач-онколог Дилшод Ибрагимов каби тажрибали ҳамда Гулсара Турсунова, Шаҳноза Хасановадек ёш мутахассисларнинг фикр-мулоҳазалари билан қизиқиб, ҳамиша уларни қўллаб-қувватлайди. Ўзига нисбатан билдирилган ишонч ва ҳурматни оқлашга ҳаракат қилади. Шу кунларда шифохонанинг ёш шифокорлари Ботир Қобилов ва Элдор Саидовлар Белоруссиянинг Минск шаҳрига малака ошириш мақсадида жўнаб кетишмоқчи. Уларнинг ҳар бирига давлат ҳисобидан 20 миллион сўмдан маблағ ажратилган. Ўз соҳаси бўйича чет элдаги ҳамкасблари билан тажриба алмашиб, тиббиётдаги янгиликларни вилоятимизда тадбиқ этишни ният қилишган.

Олимнинг ўзи сингари илм-маърифатли, комил фарзандлари, шогирдлари бор. Оталардан болаларга ҳаммаси ўтади–одамийлик, касбий жиҳатдан мукаммаллик, фидойилик, ташкилотчилик, ташаббускорлик фазилатлари. Тўнғич ўғли Қаҳрамон молиячи. Аброр Тошкент педиатрия институтини тамомлаган, айни пайтда Россия онкология илмий маркази аспиранти. Шогирдлари Бегзод Наврўзов, Санжар Худоёров, Ботир Қорахўжаев, Шакар Маткаримовалар халқимиз саломатлигини асраб-авайлашдек савоб иш билан банд.

Сулаймон Абдужабборов бой тажрибаси ва юқори малакаси билан вилоятимиз соғлиқни сақлаш тизимидаги ислоҳотларга бош-қош бўлаётир. У илмий салоҳиятини аҳоли ҳаётига салбий таъсир кўрсатаётган омилларни аниқлаш, унинг олдини олиш, онкологик касалликларда қўлланиши керак бўлган жараёнлар, лозим жиҳатларни амалиётда асослашга эътибор қаратмоқда.



Шаҳноза ЮЛДАШЕВАскачать dle 12.0
Рейтинг статьи:
  
Уважаемый посетитель, Вы зашли на сайт как незарегистрированный пользователь. Мы рекомендуем Вам зарегистрироваться либо зайти на сайт под своим именем.