"СЎҒДИЁНА" КУЧЛИ ОЛТИЛИКДА

   Coca Cola суперлигасида тўп сураётган Жиззахнинг "Сўғдиёна" жамоаси футболчилари чемпионатда кучли олтиликдан жой олиш учун астойдил ҳаракат қилишаяпти.

Суперлига 23-туридан ўрин олган"Сўғдиёна"—"Насаф" жамоалари ўртасидаги беллашув кўпчилик футбол мухлисларининг эътиборини тортди. Учрашувда дарвозаларга тўртта тўп киритилди. Жиззахлик футболчилар учрашувнинг дастлабки дақиқалариданоқ ҳужумкор ўйин намойиш этишди. "Сўғдиёна" футболчиси Шохруз Норхонов ўйиннинг 7-дақиқасида ҳисобни очди. Ўз дарвозаларидан тўп ўтказиб юборгач, қаршиликлар жонланиб қолишди. 25-дақиқада "Насаф" футболчиси Бобир Абдухолиқов ҳисобни тенглаштирди — 1:1. Учрашувнинг 61-дақиқасида Жавоҳир Қаҳрамонов жамоасини олдинга олиб чиқди. Ҳисоб 2:1. "Сўғдиёна" ҳужумчиси Баҳодир Насимов учрашув ҳаками томонидан қўшиб берилган тўртинчи дақиқада учинчи тўпни рақиб дарвозасига йўллади. Учрашув 3:1 ҳисобида якун топди.

24-турда "Сўғдиёна" Тошкентда "Бунёдкор" жамоасининг меҳмони бўлди. Афсуски, мазкур беллашувда вакилларимиз 1:0 ҳисобида имкониятни бой бериб қўйишди. Хуршид Ғиёсов киритган ягона гол учрашув тақдирини ҳал қилди.

25-турда "Сўғдиёна" Навоийнинг "Қизилқум" жамоасини қабул қилади. Учрашув 29 ноябрь куни соат 14.00 да бошланиши режалаштирилган. "Сўғдиёна" 34 очко тўплаб, чемпионат турнир жадвалининг олтинчи поғонасидан жой олиб турибди.

Васил ИЛЁСОВ.