МУРОЖААТНОМА ТОПШИРИЛДИ

    Бугун мамлакатимиз муҳим сиёсий жараён — Парламент ва маҳаллий Кенгашларга сайловлар руҳи билан яшамоқда. Табиийки, Ўзбекистон хотин-қизлар қўмитаси ҳам мазкур муҳим сиёсий жараёндан зинҳор четда тура олмайди. Шундан келиб чиққан ҳолда, Ўзбекистон хотин-қизлар қўмитаси мазкур жараёнда иштирок этаётган сиёсий партияларга қўмитанинг махсус мурожаатномасини қабул қилган эди.

   Айни пайтда жойларда Ўзбекистон хотин-қизлар қўмитаси томонидан қабул қилинган мурожаатномани тантанали равишда партияларнинг вилоят кенгашлари раҳбарларига топшириш маросимлари бўлиб ўтаяпти. Ўтган жума куни Жиззах шаҳридаги “Ёшлар иннавацион маркази”да ҳам ана шундай тадбир бўлди.

   Хотин-қизлар қўмиталари ва партиялар фаоллари иштирок этган тадбирда Ўзбекистон хотин-қизлар қўмитасининг мурожаатномасини вилоят ҳокими ўринбосари, хотин-қизлар қўмитаси раиси Назира Мухторова йиғилганларга ўқиб эшиттирди. Мурожаатнома қарсаклар билан олқишланди. Шундан сўнг ҳар бир сиёсий партиянинг вилоят кенгаши раислари мурожаатнома бўйича ўзларининг фикр ва мулоҳазаларини билдирдилар.

   —Мазкур ҳамкорлик мамлакатимизда хотин-қизларнинг салоҳиятини янада ривожлантириш, етакчилик қобилиятини кучайтиришда муҳим аҳамият касб этади,—деди тадбирда сўз олган Ўзбекистон либерал демокаратик партияси вилоят кенгаши раиси Эркин Холматов. —Мамлакатимиздахотин-қизларнинг сиёсатчи раҳбар ва жамоат арбоби сифатида ўзларини намоён қилишлари учун барча қулайликлар яратилган. Юртимизда олиб борилаётган ижтимоий-сиёсий, иқтисодий, ахборот ва мафкуравий ислоҳотлар жараёнида уларнинг иштирокини кенгайтириш ўз самарасини беришига ҳеч қандай шубҳа йўқ.

   Тадбирда аёлнинг хоҳ номзод, хоҳ сайловчи бўлсин, у ўз фуқаролик нуқтаи назарини намоён этмоқни маънавий-ҳуқуқий масъулият деб билиши, ижтимоий-сиёсий фаолликка интилишни эса сайловга зўрма-зўраки чиқиш эмас, балки инсон қалбининг фахрли бир мажбурияти, деб қабул қила оладиган зот эканлиги алоҳида қайд этилди.

Бекпўлат ТОҒАЕВ.